نزار عبد القادر صالح يكتب: مالكم كيف تحكمون: محادثات سويسرا (4 ـ4)
نزار عبد القادر
س: أمبارح قلت لي السيناريو الأول يانزار ياولدي وهو أنه مجلس الأمن يطلع ليهو قرار تحت الفصل السابع من ميثاق الأمم المتحدة، أها السيناريوهات المحتملة التانية شنو ؟
ج: السيناريو التاني يا حبوبتي، نشوب حرب أهلية شاملة تعم كل البلد خاصة المناطق الماوصلتها الحرب لحدي حسه، ومؤشراتها فشل منبر جدة وعدم تنفيذ الطرفين لبنود إعلانه، وإحتمالية فشل محادثات جنيف لحدى اللحظة بسبب تعنت الجيش عن المشاركة فيها، وفشل الجيش والدعم السريع في الوفاء بالتزاماتهم في بناء الثقة وظاهرة الانتشار الواسع لتسليح المدنيين والقبائل وزيادة خطاب الكراهية القائم على أسس إثنية وعرقية وجهوية، والغياب التام للحل السياسي التفاوضي، وجلوس القوى المدنية على كراسي المتفرجين.
س: يالطيف ألطف، أها قول لي السيناريو التالت ده حيكون شكلوا كيف؟
ج: الوالد يصل لإتفاق مع إبنه الشرعي
س: مافهمت؟
ج: الجيش تتزايد عليه الضغوط الدولية خاصة من قبل الولايات المتحدة الأمريكية وحلفائها، ويصل لإتفاق مع قوات الدعم السريع لوقف إطلاق النار، بدون أي عملية سياسية تشارك فيها القوى السياسية المدنية، وبعد الإتفاق يقوموا الإثنين ومعاهم بعض الحركات المسلحة (الحركة الشعبية لتحرير السودان-شمال جناح مالك عقار وحركة العدل والمساواة، وجيش تحرير السودان جناح منى أركو مناوي) يشكلوا مع بعض حكومة شمولية عسكرية دكتاتورية جديدة في البلد (25 أكتوبر 2021م 2).
س: والسيناريو الرابع؟
ج: السيناريو الليبي
س: بتقصد شنو بالسيناريو الليبي؟
ج: ليبيا من يوم سقوط نظام العقيد القذافي، والبلد مقسمة فعليا لثلاثة مناطق رئيسية: العاصمة طرابلس بتسيطر عليها قوات عسكرية ماعندها ولاء لجهة معينة، في حين مدن مصراتة والزاوية وجبل نفوسة في الغرب بتسيطر عليها قوات عسكرية مؤيدة لثورة فبراير، وعقيلة صالح وقوات اللواء خليفة حفتر مسيطرين على شرق ليبيا بشكل كامل وعدد من مدن الجنوب.
نحنا عندنا في السودان الجيش والدعم السريع و الحركة الشعبية جناح الحلو التلاتة متقاسمين البلد، الجيش مسيطر على ولايات شمال وشرق السودان وقوات الدعم السريع مسيطرة على ولايات فى الغرب والوسط، وقوات عبدالعزيز الحلو مسيطرة على مناطق في جنوب كردفان.
س: في سيناريوهات تانية يانزار ياولدي؟
ج: أيوة يا حبوبتي، سيناريو “رجل أمريكا”
س: والله مافهمت منك ولا حاجة بتقصد شنو برجل أمريكا يانزار ياولدي
ج: شوفي يا حبوبتي ، الأمريكان لمن يكونوا عاوزين بحق وحقيقة يعملوا حاجة في بلد، بعملوها حتى بدون صدور أي قرار من مجلس الأمن، وبدون أي حاجة اسمها شرعية دولية ذي ما بقولوا، وحأضرب ليكي أمثلة على الحاجات القامت بيها أمريكيا للحفاظ على مصالحها وأمنها القومي، سنة 1994م الولايات المتحدة الأمريكية أعادت بالقوة الرئيس جان أريستيد للسلطة في هاييتي بعد ما الجيش عمل عليهو إنقلاب عسكري أطاح بيهو سنة 1991م، علما بأنه أريستيد فاز في أول إنتخابات ديمقراطية تتعمل في جزيرة هايتي.
وسنة 2001م بعد أحداث 11 سبتمبر، الولايات المتحدة الأمريكية جابت حامد كرازي (أفغانستان) وسلمته السلطة يف أفغانستان.
وسنة 2003م الولايات المتحدة الأمريكية ومعاها قوات التحالف غزت العراق. وقعدت وإحتلت العراق من يوم 21 أبريل 2003م حتى يوم 28 يونيو 2004م وبعدها سلمت السلطة لأحمد الجلبي المشهور ب (مهندس الغزو الأمريكي للعراق).
ده برضو سيناريو مطروح، ويطرح سؤال هل ممكن الولايات المتحدة الأمريكية تعيد الدكتور عبدالله #حمدوك للسلطة بعد ما تمت الإطاحة به وبحكومته المدنية بإنقلاب 25 أكتوبر 2021م؟ وله حتختار شخصية مدنية غير حمدوك؟ أسئلة محتاجة للتفكير. بس العاوز أقوله ليكي يا حبوبتي إنو دي نماذج حدثت بالفعل في السنيين الفاتت.
س: شنو أسوا السيناريوهات يانزار ياولدي؟
ج: أسوا السيناريوهات واحد من الطرفين المتحاربين ينتصر على التاني يا حبوبتي: الجيش أو الدعم السريع، وبعد ده عينك تاني ما تشوف إلا النور، المنتصر أيا كان أكيد حيفرض شروطه علينا بقوة السلاح، وما حتسمعي تاني كلمة مدنية ولا إنتخابات ولا ديمقراطية ولا حقوق إنسان ولا شعار “حرية سلام وعدالة”.
س: الصورة غاتمة شديد يانزار ياولدي، طيب كيف ممكن الحرب دي تقيف بدون كل السيناريوهات الحكيتها لي دى ويكون في سلام في البلد؟
ج: الحبيب الإمام #الصادق_المهدي عليه رحمة الله، أتذكر بعد مفاوضات الدوحة وجوبا، قال كل المفاوضات بتاعت السلام التمت في عهد الإنقاذ “فشلت” عشان كانت دائما مفاوضات ثنائية، أفرزت في النهاية حلول مشوهة وغير قابلة للتطبيق، وقال عشان يكون في سلام شامل ضروري إشراك القوى المدنية السياسية كطرف أصيل في أي مفاوضات قادمة ومعاهم تجمعات النساء والشباب ورجال الدين.
س: معليش يانزار ياولدي سألتك الليلة أسئلة كتيرة آخر حاجة عاوز تقول لي شنو؟
ج: عاوز أقول ليكي أسال رب العرش العظيم أن يرحم الحبيب الإمام الصادق المهدي لو كان موجود ده كله ما كان حصل،وان ينهي الحرب اللعينة دي ويحفظ بلدنا من التفكك والتقسيم، ويرزقنا بديدييه دروغبا سوداني، ولو ماعارفه يا حبوبتي قصة دروغبا ده بحكيها ليكي في الأيام الجاية.
سويسرا 23 أغسطس 2024م
