نزار عبد القادر صالح يكتب : 3890 ضابط أممي
3890 ضابط أممي
س: ده شنو الرقم الفوق ده يا حبوبتي؟
ج: ده عدد القوات الأممية الموجودة الليلة في السودان يانزار ياولدي
س: الليلة؟
ج: أيوة الليلة يانزار يا ولدي، الأربعاء 13 نوفمبر 2024 ، في 3890 ضابط جيش وشرطة أجانب قاعدين جوه البلد، ما تسمع الكلام الفارغ القاعدين يقولوا فيهو جماعة “بل بس” و “لا للسلام” “مشتركة فوق” و”لطمة أممية” و”مافي قوات أممية حتدخل بلدنا”، القوات دي قاعدة وبموافقة الحكومة.
س: لكن قرار مجلس الأمن لسه ما طلع، عشان يرسلوا قوات أممية لحماية المدنيين؟
ج: القوات دي قاعدة يانزار يا ولدي من 2011م ماطلعت
س: حبوبتي، ممكن تشرحي لي شوية شوية؟
ج: حاضر يا نزار ياولدي، يوم 27 يونيو 2011، مجلس الأمن في نيويورك طلع قرار تحت الفصل السابع من ميثاق الأمم المتحدة بالرقم 1990/2011 عشان الأوضاع في منطقة أبيي
س: أبيي دى وين يا حبوبتي؟
ج: أبيي دي يانزار يا ولدي، هى الجسر البربط بين بلدنا وبلدنا التانية جنوب السودان، شمال منطقة أبيي بتقع ولاية جنوب كردفان وفي جنوبها ولاية شمال بحر الغزال وبحر العرب وفي شرقها ولاية الوحدة وفي غربها بتقع ولاية جنوب دارفور.
س: والساكنين فيها منو؟
ج: سا كننها قبائل المسيرية ودينكا نقوك. والكلام عنها كتير محتاجة ليهو لكتاب يا نزار يا ولدي عشان تعرف كل صغيرة وكبيرة عن أبيي.
س: طيب يا حبوبتي، ما قلتي لي قرار مجلس الأمن ده كان مضمونه شنو؟ والقوات الأممية دي جايية أبيي عشان تعمل شنو؟
ج: قرار مجلس الأمن رحب بالاتفاق الوقع بين ناس الحكومة والحركة الشعبية لتحرير السودان يوم 20 يونيو 2011 في أديس أبابا بخصوص الترتيبات المؤقتة لإدارة وأمن منطقة أبيي، وقرر ينشئ قوة سماها “قوة الأمم المتحدة الأمنية المؤقتة لأبيي”.
س: ومهام القوة دي شنو؟
ج: (1) يجعلوا أبيي خالية من أي وجود لقوات مسلحة (2) إزالة الألغام (3) تيسير تقديم المساعدات الإنسانية (4) تدريب الموظفين، والتنسيق مع الجهات المعنية في مسائل القانون والنظام (5) توفير الخدمات الأمنية للهياكل الأساسية النفطية.
س: والقوة دي هل من مهامها حماية المدنيين؟
ج: أكيد يا نزار يا ولدي، شوف الفقرة (3) في منطوق قرار مجلس الأمن بتقول شنو:
“وإذ يتصرف بموجب الفصل السابع من ميثاق الأمم المتحدة، يأذن لقوة الأمم المتحدة، الأمنية المؤقتة لأبيي بأن تضطلع، ضمن قدراتها ومنطقة انتشارها، بالإجراءات الضرورية التالية:
(د) القيام، دون المساس بالمسؤوليات المنوطة بالسلطات المختصة، بحماية المدنيين المعرضين لخطر العنف البدني الوشيك في منطقة أبيي
س: يعني هل مسموح لقوات الأمم المتحدة إنها تستخدم القوة عند حماية المدنيين؟
ج: أيوة يانزار ياولدي، مجلس الأمن منحهم سلطة استخدام القوة في حماية المدنيين وكمان في حماية العاملين في المجالات الانسانية في أبيي.
س: والقوة دي على رأسها منو؟
ج: قائد القوة من نيجيريا اسمو Benjamin Sawyerr ومساعده من باكستان إسمو Ameer Umrani وخليني أقول ليك أمير ده عينوهو يوم 31 مارس 2024 الفات وناس الحكومة في بورتسودان وافقوا عليهو وأدوهو تأشيرة دخول.
وقائدة الشرطة في أبيي واحدة كينية إسمها Violet LUSALA وفي واحدة تاني ماسكة رئيسة لدعم البعثة إسمها Uchenna Odenigbo ، دي يانزار ياولدي عينوها في البعثة الشهر الفات أكتوبر 2024 كانت شغالة مع فولكر في بعثة يونيتامس.
س: والقوة الأممية دي فيها كم ضابط جيش وكم ضابط شرطة يا حبوبتي؟
ج: 3250 ضابط جيش، و640 ضابط شرطة
س: والضباط ديل رجال ونسوان يا حبوبتي؟
ج: أيوة يانزار ياولدي
س: وجايين من ياتو دول؟
ج: من كل قارات العالم الخمسة يانزار ياولدي، من ألبانيا، وبنغلادش، وبنين، بوتان، بوليفيا، البرازيل، بوركينا فاسو، بوروندي، كمبوديا، الصين، مصر، السلفادور، فيجي، غامبيا، غانا، غواتيمالا، غينيا، الهند، أندونيسيا، الأردن، كينيا، غيرغستان، ليبيريا، ملاوي، ماليزيا، موريتانيا، منغوليا، المغرب، ناميبيا، نيبال، نيجيريا، باكستان، بيرو، روسيا، رواندا، سيراليون، جنوب أفريقيا، طاجكستان، تايلاند، تونس، أوغندا، أكرانيا، تنزانيا، أوروغواي، فيتنام، زامبيا وزمبابوي.
س: أكتر دول عندهم ضباط منو؟
ج: غانا (668)، باكستان (593)، الهند (591)، بنغلادش (514).
س: وناس الحكومة وبعثتهم في نيويورك موافقين على الكلام ده؟
ج: أكيد يانزار ياولدي، والدليل أنه سنويا بطلع قرار جديد من مجلس الأمن بجدد ولاية القوة الأمنية لمدة سنة.
س: وولايتها حتنتهي متين؟
ج: حسب آخر قرار، ولايتها حتنتهى يوم 15 نوفمبر 2024م
س: وحيجددوا ليها تاني لمدة سنة؟
ج: أيوة يانزار ياولدي
س: طيب إذا ناس الحكومة وافقوا على نشر قوات أممية في أبيي يا حبوبتي، تفتكرى المانعهم شنو إنهم يوافقوا على نشرها في الجزيرة والجنينة وباقي المناطق؟
سويسرا 13 نوفمبر 2024م
