نزار عبد القادر صالح :قانون اللجوء المصري (4)
س: صحي مشروع القانون المصري الجديد منع اللاجئ من العمل السياسي يانزار ياولدي؟
ج: أيوة يا حبوبتي، المادة 30 قالت كلام واضح وضوح الشمس، اللاجئ ممنوع من ممارسة العمل السياسي والحزبي والنقابي، مش كده وبس، قالت كمان اللاجئ ممنوع حتى من المشاركة مع أي حزب سياسي مصري.
س: ممكن تقول لي نص المادة بالظبط يانزار ياولدي لأنه الموضوع ده مهم شديد خاصة للسودانيين القاعدين هناك؟
ج: “يحظر على اللاجئ مباشرة أي عمل سياسي أو حزبي أو أي عمل داخل النقابات، أو التأسيس أو الإنضمام أو المشاركة بأي صورة في أي من الأحزاب”.
س: تفتكر يانزار ياولدي، المصريين لييه حظروا على اللاجئ ممارسة العمل السياسي؟
ج: بعض المصريين قالوا بلدنا فيها أكتر من 9 مليون أجنبي من 60 دولة، العمل السياسي حيخلق مشاكل بين مواطني الجنسية الواحدة، كل واحد فيهم عنده توجهه السياسي الخاص، عشان كده الحظر جاء حماية للجاليات دي من وقوع مشادات وصدامات تستدعي تدخل أجهزة الأمن والشرطة.
س: حيحصل شنو للاجئ إذا اللجنة الدائمة أسقطت منه صفة اللاجئ؟
ج: حيتم إبعاده مباشرة خارج البلد
س: طيب يانزار ياولدي، إذا إفترضنا إنو في لاجئ سوداني إسمه محمد أحمد معاه زوجته وأطفاله، محمد أحمد ده اللجنة أسقطت عنه صفة اللاجئ وقررت ترحيله خارج البلد، زوجته وأطفاله مصيرهم شنو؟
ج: سؤال كويس يا حبوبتي، القانون ما إتكلم عن الحالة دي، بس ممكن اللائحة التنفيذية المنتظرة توضحها.
س: هل اللاجئ عنده حقوق؟
ج: أيوة عنده حقوق كتيرة، منها الحصول على بطاقة شخصية تثبت صفته
س: وتاني؟
ج: الحصول على وثيقة سفر
س: وثيقة سفر ذي البدوها للفلسطينيين دي يانزار ياولدي؟
ج: أيوة يا حبوبتي، ودى حاجة كويسة لانها حتحل مشكلة لسودانيين كتار ماعندهم جوازات سفر، أو ما قادرين يجددوا جوازات سفرهم، أو خايفين يطلعوا من مصر وما يقدروا يرجعوا تاني إلا بتأشيرة دخول جديدة.
س: والوثيقة دي مدتها كم؟
ج: اللائحة التنفيذية حتوضح طريقة إصدارها ومدتها وتجديدها
س: هل ممكن لاجئ ما يتحصل على وثيقة السفر دي؟
ج: أيوة ممكن، القانون منح اللجنة الدائمة الحق في منع إصدار وثيقة السفر “لأسباب تتعلق بالأمن القومي أو النظام العام”.
س: هل الأسباب دي معروفة؟
ج: لا
س: طيب هل ممكن السلطات المصرية تسلم لاجئ لدولته الأم؟
ج: القانون منع تسليم اللاجئ للدولة الشايل جنسيتها.
س: شنو الحقوق التانية المنحها القانون للاجئ؟
ج: ممارسة كافة الشعائر الدينية، ومسائل الأحول الشخصية من زواج وطلاق ونفقة وميراث ووقف، ويتمتع اللاجئ بذات الحقوق المقررة للأجانب المتعلقة بالحقوق العينية الأصلية والأموال الثابتة والمنقولة والحقوق المرتبطة بيهم، وله الحقوق ذاتها فيما يتعلق بالملكية الفكرية والحق في التقاضي والإعفاء من الرسوم القضائية.
س: الزواج والطلاق حسب القانون المصري وله حسب قانون بلد اللاجئ؟
ج: حسب قانون بلد اللاجئ
س: هل للاجئ الحق في العمل في مصر يانزار ياولدي؟
ج: أيوة يا حبوبتي ليهو الحق في العمل وممارسة المهن الحرة، شرط تكون عنده شهادة معترف بيها، وعنده تصريح مؤقت من السلطات المختصة.
س: هل للاجئ الحق في تأسيس شركة؟
ج: أيوة يا حبوبتي
س: والحق في الرعاية الصحية؟
ج: أيوة يا حبوبتي
س: والحق في التنقل؟
ج: أيوة
س: هل للاجئ الحق في إختيار مكان سكنه؟
ج: أيوة يا حبوبتي، فقط عليه إخطار اللجنة الدائمة بعنوان إقامته الدائم، وكمان يخطرهم إذا حصل أي تغيير في العنوان.
س: هل اللاجئ ملزم بدفع ضرائب ورسوم؟
ج: القانون منع تحميل اللاجئ ضرائب أو رسوم أو أعباء مالية مهما كان مسماها، تختلف عن المقررة على المصريين.
س: الأطفال العندهم صفة لاجئين، هل عندهم الحق في التعليم يانزار ياولدي؟
ج: أيوة يا حبوبتي، ليهم الحق في التعليم الأساسي، والحق في الاعتراف بالشهادات الدراسية الممنوحة ليهم في الخارج.
س: وحقهم في دخول الجامعات؟
ج: القانون ما إتكلم عنها
س: عرفنا اللاجئ ممنوع من العمل السياسي والحزبي والنقابي، هل اللاجئ ممنوع كمان يشترك في الجمعيات الأهلية؟
ج: القانون أعطاه الحق في الإشتراك في عضوية الجمعيات وكمان في مجلس إدراتها، ولكنه قال وفقا للقانون المنظم لممارسة العمل الأهلي ولائحته التنفيذية.
س: هل اللاجئ عنده الحق في الحصول على الجنسية المصرية؟
ج: أيوة
س: هل اللاجئ عند الحق في إعادة التوطين في أمريكا أو كندا أو أستراليا أو أوروبا؟
ج: أيوة، اللجنة الدائمة حتقوم تنسق مع الجهات الدولية المختصة بالموضوع ده، واللائحة التنفيذية حتوضح النقطة دي أكتر.
س: هل للاجئ الحق في العودة الطوعية لبلده؟
ج: أيوة الباب مفتوح وفي أي وقت.
س: صحى يانزار ياولدي حيدفعوا لكل لاجئ مبلغ ألفين دولار في الشهر؟
ج: بكرة بقول ليكم
سويسرا 21 نوفمبر 2024م
