نزار عبد القادر صالح يكتب :الصادق_المهدي وقوات الدعم_السريع
الصادق_المهدي
س: حتقول لي شنو الليلة يانزار ياولدي؟
ج: الليلة وبمناسبة مرور 4 سنوات على رحيل الحبيب الإمام الصادق المهدي عليه الرضوان، حأقول ليكي يا حبوبتي بعض من مواقفه وتصريحاته عن قوات الدعم السريع لمن الناس ما كانت بتقدر تفتح خشمها بكلمة واحدة ضد الحكومة وضد الدعم السريع، و أقول ليكي عن الهجوم الإتعرض ليهو من ناس الجبهة الإسلامية القومية وأجهزتهم الأمنية والقضائية وحتي التشريعية.
س: قال شنو بالله الحبيب الإمام عن قوات الدعم السريع يانزار ياولدي؟
ج: حأقول ليكي موقفين مسجلين ليهو في التاريخ، الأول سنة 2004 والتاني سنة 2014
س: سنة 2004 قال عنهم شنو؟
ج: يوم 27 يونيو 2004م بعد ما رجع من زيارته لدارفور (4 أيام)، عمل ليهو مؤتمر صحفي في دار الأمة في أمدرمان، حضرته عدد من وسائل الإعلام السودانية والعربية والعالمية، كشف فيهو عن كل الجرائم القامت بيها حكومة الجبهة الإسلامية القومية ومليشيا الجنجويد في دارفور.
س: الإمام قال إنتهاكات قامت بيها مليشيا الجنجويد في دارفور؟
ج: أيوة يا حبوبتي
س: وما خاف؟
ج: الإمام ما بخاف ده جدو الإمام محمد أحمد المهدي، وما تسمعي كلام الناس العندهم مرض اسمو “الصادقفوبيا” والبقولوا عليهو “متذبذب” و”ماسك العصاية من النص” و”بوخة مرقة” وغيرها من الألفاظ البترد عليها مواقفه البطولية مش جعجعة مراهقي السياسة في وسائل التواصل الإجتماعي.
س: وسنة 2014 الإمام قال شنو عن قوات الدعم السريع؟
ج: يوم 17 مايو 2014، الإمام خاطب ندوة جماهيرية في منطقة الولى في الحلاوين في ولاية الجزيرة قال فيها بالحرف الواحد:
“قوات الدعم السريع دي قوة مسلحة غير دستورية، ووجودها بتعارض مع القانون، وارتكبت جرائم وإنتهاكات جسيمة لحقوق الإنسان في دارفور وفي جنوب وشمال كردفان، وبتضم مرتزقة في صفوفها.
س: الكلام ده قالوا الإمام سنة 2014 يانزار ياولدي؟
ج: أيوة ياحبوبتي، والكلام ده كله مرصود وموثق ومسجل ليهو في التاريخ ومافي زول حيقدر يمسحو
س: وقال تاني شنو في الندوة دي؟
ج: قال في مدينة الأبيض في (200) بلاغ ضد قوات الدعم السريع، و في 20 بلاغ في منطقة أبو زبد برضو ضدهم، والنيابة العامة والقضاء قاعدين بتفرجوا ماعاوزين يتحركوا.
س: وقال تاني شنو يانزار ياولدي؟
ج: قال جهاز الأمن السوداني ده قاعد يخرق في الدستور، وبدل ما تكون مهمته جمع المعلومات، بقت مهمته صناعة كتائب وقوات ومليشيات.
وقال جهاز الأمن زمان “زي نعامة المك مافي زول بقول ليها تك” لكن نحن من الليلة بنقول ليهو “تك وتاني تك تك وتاني تك تك
س: صحي دي بقت اسم رقصة للعروس؟
ج: أيوة يا حبوبتي، رقصة “قول ليهو تك”
س: وتاني أخطر حاجة قالها شنو الإمام سنة 2014 قبل ثورة ديسمبر المجيدة؟
ج: قال حزب الأمة القومي خلاص بدأ “الثورة الهادئة” ضد النظام الحاكم
س: صحي يا نزار ياولدي الإمام قال الكلام ده كله قدام الناس؟
ج: ما قلت ليك قبيل يا حبوبتي، ده كلو قالوا في ندوة سياسية جماهيرية في الحلاوين، عشان تعرفى شجاعة الإمام والأنصار ، مش يقولوا ليك “شالو خيمتهم وهربوا”.
س: وناس جهاز الأمن عملوا للإمام شنو؟
ج: الساعة 8 ونص بالليل، بعد ما رجع الإمام من الحلاوين، جوهو ناس الأمن لبيته في الملازمين ، وقالوا ليهو نحنا عندنا أمر من نيابة أمن الدولة باعتقالك بسبب كلامك القولتو في الندوة عن قوات الدعم السريع وانتهاكاتها في دارفور وكمان كلامك عننا أنحنا.
س:وناس الجهاز استندوا في بلاغهم على ياتو مواد في القانون الجنائي؟
ج: مواد تقويض النظام الدستوري والعمل المعارض ضد النظام الحاكم بالقوة
س: والمواد دى عقوبتها شنو؟
ج: عقوبتها الإعدام
س: والبرلمان كان رأيه شنو في إعتقال الإمام؟
ج: يوم الأربعاء 14 مايو 2014، البرلمان عقد ليهو جلسة خاصة برئاسة الفاتح عز الدين القيادي بالجبهة الإسلامية القومية ورئيس البرلمان، لمناقشة إتهامات الإمام الصادق لقوات الدعم السريع بارتكاب جرائم حرب في دارفور واغتصاب ونهب ممتلكات المواطنين.
س: الفاتح عزالدين قال شنو؟
ج: قال الكلام القالوا الصادق المهدي ده بندرج تحت “الخيانة العظمي” ، وقال قوات الدعم السريع دي هي جزء أصيل من القوات المسلحة، وفكرتها نبعت من جوه قبة البرلمان ده.
س: صحي يانزار ياولدي، الفاتح قال الكلام ده؟
ج: أيوة ياحبوبتي
س: وباقي النواب قالوا شنو؟
ج: اتهموا الحبيب الإمام برضو بالخيانة العظمى، والعمالة والتخاذل وإضمار العداء للقوات المسلحة ووصفوا تصريحاته “بالمستفزة”، وحرضوا السلطات على مساءلته ومحاسبته وإنزال عقوبات رادعة في حقه دون أي مجاملة أو ترضيات، وفي نفس الوقت النواب دافعوا باستماتة عن قوات الدعم السريع.
س: صحى عبدالله مسار رئيس كتلة حزب الأمة الوطني علق برضو؟
ج: أيوة، وصف الحبيب الإمام “بالمتخاذل”
أسال الله أن يتقبل الحبيب الإمام قبولا حسنا، ويدخله فسيح جناته.
سويسرا 26 نوفمبر 2024م
