نزار عبد القادر صالح يكتب :قانون اللجوء المصري (5)

نزار عبد القادر صالح يكتب : قانون اللجوء المصري (5)

قانون اللجوء المصري (5)

س: صحى يانزار ياولدي المصريين حيدفعوا لكل لاجئ ألفين دولار في الشهر؟
ج: ده كلام ما صاح يا حبوبتي
س: لييه ماصاح؟
ج: إنتي عارفة لو صاح، كل اللاجئين القاعدين في أوروبا وفي أمريكا حيخلوا دولهم دي ويجوا يطلبوا لجوء في مصر، وما تستبعدى كمان يا حبوبتي المصريين زاتهم يقوموا يطلبوا لجوء في بلدهم.
س: لييه المبلغ كبير وله شنو يانزار ياولدي؟
ج: أيوة يا حبوبتي، المبلغ كبير شديد، عدد اللاجئين المسجلين في المفوضية لحدي أول أمبارح كانوا 725 ألف شخص، يعني لو حسبنا كل واحد منهم أدوهو 2000 دولار في الشهر، معناها الحكومة المصرية حتدفع نهاية كل شهر للاجئين مبلغ وقدره مليار وأربعمائة وخمسون مليون دولار، يعني نهاية السنة حتكون دفعت 17 مليار و400 مليون دولار.
س: تمام يانزار ياولدي كلامك وشرحك واضح ومقنع وأنا عارفة مصر بتمر الأيام دي بظروف إقتصادية صعبة.
ج: فعلا يا حبوبتي، البلد فيها أزمة اقتصادية ومعاها كمان حوالي 10 مليون أجنبي في البلد.
س: نرجع للقانون يانزار ياولدي، الأيام الفاتت عرفت معاك مواد كتيرة في مشروع القانون الجديد، عرفت مصطلح لاجئ وطالب لجوء والفرق بينهم، وعرفت كمان اللجنة الدائمة الحتشرف على أوضاع اللاجئين، وعرفت حقوق اللاجئ وأسباب إسقاط صفة اللجوء، بس لسه عندى أسئلة تاني، هل القانون إتكلم عن الشخص الدخل لمصر بطريقة غير شرعية؟
ج: أيوة يا حبوبتي، المادة 31 من مشروع القانون قالت أي زول دخل لمصر بطريقة غير قانونية وبتتوفر فيهو شروط اللاجئ، عليه أن يتقدم مباشرة بطلبه للجنة الدائمة قبل ما يتم 45 يوم من تاريخ دخوله.
س: والمصريين ما حيقولوا ليهو أنت خالفت القانون عشان دخلت بطريقة غير قانونية للبلد؟
ج: المادة 32 من مسودة القانون، قالت أي واحد جاي من مناطق نزاعات مسلحة ودخل للبلد بطريقة غير شرعية، وسلم نفسه مباشرة للسلطات الحكومية، حيتم إعفائه من أي مساءلة مدنية أو جنائية.
س: يعني هو أصلا في عقوبة جنائية إذا الواحد دخل للبلد بطريقة غير قانونية؟
ج: بالتأكيد يا حبوبتي، والعقوبة مش بس للأجنبي، العقوبة بتشمل كمان المصري الدخله أو سهل ليهو إجراءات دخوله
س: المصري البشتغل في التهريب؟
ج: أيوة يا حبوبتي، المادة 6 من قانون مكافحة الهجرة غير الشرعية وتهريب المهاجرين لسنة 2016 قالت “يعاقب بالسجن المشدد وبغرامة لا تقل عن 200 ألف جنيه ولا تزيد على 500 ألف جنيه أو بغرامة مساوية لقيمة ما عاد عليه من نفع أيهما أكبر، كل من أرتكب جريمة تهريب المهاجرين أو الشروع فيها أو توسط في ذلك”.
وقالت كمان
“تكون العقوبة السجن المشدد مدة لا تقل عن خمس سنوات وغرامة لا تقل عن 500 ألف جنيه ولا تزيد على مليون جنيه أو غرامة مساوية”.
س: صحي قانون اللجوء المصري ده ده فيهو عقوبات يانزار ياولدي؟
ج: أيوة يا حبوبتي، آخر 3 مواد في القانون (37 و38 و39) إتكلموا عن العقوبات دي.
س: المواد دي فيها شنو؟
ج: المادة (37) فرضت عقوبات على كل شخص مصري أو أجنبي يشغل أو يؤوي طالب لجوء بدون ما يخطر قسم الشرطة الواقع في دائرته مكان العمل او الإيواء، يعاقب بالحبس لمدة لا تقل 6 شهور وغرامة مالية تتراوح بين 50 و100 ألف جنيه.
س: والمادة 38؟
ج: قالت أي لاجئ يمارس نشاط من شأنه المساس بالأمن القومي أو النظام العام، أو يتعارض مع أهداف ومبادئ الأمم المتحدة أو الإتحاد الأفريقي أو جامعة الدول العربية، أو إرتكب أي عمل عدائي ضد دولته أو اي دول أخرى، يُعاقب بالحبس مدة لا تقل عن 3 سنوات، وبغرامة لا تقل عن 100 ألف جنيه ولا تزيد على 500 ألف جنيه، أو بإحدى هاتين العقوبتين.
س: والمادة الأخيرة 39؟
ج: قالت أي زول دخل لمصر بطريقة غير قانونية وما بتتوفر فيهو شروط اللاجئ، أو بتتوفر فيهو لكن ما إتقدم بطلب لجوء للجنة الدائمة قبل ما يتم 45 يوم من تاريخ دخوله لمصر، يعاقب بالحبس مدة لا تقل عن 6 شهور، وبغرامة لا تقل عن 10 ألف جنيه، ولا تزيد عن 100 ألف جنيه أو بإحدى هاتين العقوبتين.
بكرة نتكلم في حلقة أخيرة فيها تعليقاتنا على مسودة القانون.
سويسرا 23 نوفمبر 2024م