نزار عبد القادر صالح يكتب : مالكم كيف تحكمون لجنة ـشاندى ـورشماوي (5)
نزار عبد القادر
س: أها الليلة الحصل شنو في جنيف يا نزار يا ولدي؟
ج: الليلة يا حبوبتي الدول الأربعة الكتبوا مشروع القرار الخاص بالسودان نظموا جلستين للمشاورات غير الرسمية الأولى الساعة تسعة صباحا والتانية كانت الساعة واحدة الظهر. طرحوا خلالهم مقدمي مشروع القرار الفقرات الواردة بالمسودة للنقاش وسمعوا تعليقات الدول وكمان تعليقات المنظمات غير الحكومية في كل فقرة من فقرات المسودة.
س: والأربعة دول ديل هم منو يانزار ياولدى؟
ج: هم الولايات المتحدة الأمريكية، وبريطانيا، والنيرويج وألمانيا
س: مش ديل هم زاتهم القدموا مشروع القرار بتاع السنة الفاتت يانزار يا ولدي؟
ج: أيوة يا حبوبتي ماشاء الله عليكي متابعة كويس
س: أها مشروع السنة دي عنوانه شنو؟
ج: عنوانه نفس عنوان السنة الفاتت “الاستجابة للأزمة الإنسانية وأزمة حقوق الإنسان الناجمة عن النزاع المسلح المستمر في السودان”
س: والأربعة ديل كتبوا في مسودتهم دي شنو؟
ج: كتبوا حاجات كتيرة حأكتب ليكي أهم النقاط فيها:
الدول تتحمل المسؤولية الأساسية لضمان احترام وتعزيز وحماية جميع حقوق الإنسان والحريات الأساسية. الحكومة السودانية مسؤولة عن احترام القانون الإنساني الدولي، ومسؤولة عن حماية السكان من الإبادة الجماعية وجرائم الحرب والتطهير العرقي والجرائم ضد الإنسانية، نذكر القوات المسلحة والدعم السريع بالتزاماتهم بموجب العهد الدولي الخاص بالحقوق المدنية والسياسية، وبالعهد الدولي الخاص بالحقوق الاقتصادية والاجتماعية والثقافية، وبباقي الاتفاقيات الدولية خاصة أثناء النزاع المسلح.
س: والالتزام بإعلان جدة ماجابو سيرتو يانزار ياولدي؟
ج: كيف يا حبوبتي، جابو سيرتو وقالوا نذكر الطرفين بالتزاماتهم الالتزموا بيها يوم 11 مايو 2023 في مدينة جدة السعودية خاصة التزامهم بحماية المدنيين، والتزامهم بالسماح وتسهيل المساعدة الإنسانية.
س: وتاني مسودة مشروع القرار قالوا فيها شنو؟
ج: الترحيب بتقرير بعثة تقصي الحقائق وعبروا عن قلقهم العميق على النتائج الوصلت ليها البعثة، وأدانوا بصورة شديدة استمرار النزاع المسلح في البلد وانتهاكات حقوق الإنسان.
س: وشنو اهم الطلبات في مسودة مشروع القرار؟
ج: الوقف الفوري والكامل لإطلاق النار، وإنشاء آلية مستقلة لرصد وقف إطلاق النار، والتوصل عن طريق التفاوض إلى حل سلمي للنزاع وتشكيل حكومة مدنية ، ووصول المساعدات الإنسانية وإدانة للهجمات على قوافل المساعدة الإنسانية ونهبها، ونهب المستودعات الخاصة بوكالات المعونة.
س: وعن حماية المدنيين؟
ج: ايوة ياحبوبتي مسودة مشروع القرار حثت الطرفين على احترام وحماية المدنيين، بمن فيهم العاملون في المجال الإنساني والعاملون في مجال الصحة، والسماح للمدنيين بالتحرك بحرية للحصول على الخدمات الأساسية والمساعدة الإنسانية
س: والعنف الجنسي؟
ج: قالوا ضروري اتخاذ تدابير فورية ومحددة لوضع حد لمزيد من أعمال العنف الجنسي والجنساني ومنعها، بما في ذلك الاغتصاب والاستعباد الجنسي والاستغلال والاعتداء الجنسيين من جانب أفراد قواتهم أو الجماعات المتحالفة معهم، وكفالة حصول الناجين على خدمات جيدة وفي الوقت المناسب
س: والمساءلة قالوا عنها شنو يانزار ياولدي؟
ج: قالوا مافي حل في السودان بدون عمل مساءلة للطرفين عن انتهاكات حقوق الإنسان وعمل تحقيقات شفافة ومستقلة ومحايدة وذات مصداقية عشان تضع حد للإفلات من العقاب ومحاسبة المسؤولين.
س: والدول الأربعة طالبوا مجلس حقوق الإنسان بشنو يانزار ياولدي؟
ج: اول واهم حاجة ياحبوبتي طالبوا بتمديد ولاية البعثة الدولية المستقلة لتقصي الحقائق في السودان لمدة سنة تانية (يعني حتى اكتوبر 2025)، وطالبوا البعثة انها تقدم تقرير شفهي لمجلس حقوق الانسان في دورته رقم 59 (يونيو 2025)، وتقرير شامل في الدورة 60 (سبتمبر/ أكتوبر 2025م)، وكمان تقديم تقرير للجمعية العمومية في نيويورك خلال الدورة 80 (سبتمبر 2025)، وكمان لمجلس السلام والأمن التابع للاتحاد الأفريقي، وللجنة الأفريقية لحقوق الإنسان والشعوب.
س: وآخر حاجة طالبوا بيها مجلس حقوق الإنسان شنو في مسودة مشروع القرار؟
ج: طلبوا من أطراف النزاع في السودان إنهم يتعاونوا تعاون كامل مع بعثة تقصي الحقائق في أداء عملها، ويهيب بالمجتمع الدولي أن يدعم تنفيذ ولايتها دعما كاملا
س: طيب وين التوصية الجات في تقرير بعثة تقصي الحقائق الخاصة بنشر قوات أممية في السودان يانزار ياولدى؟
ج: دى ما بتطلع من جنيف ياحبوبتي، بتطلع بقرار من مجلس الأمن في نيويورك.
س: وبرضو وين التوصية بتوسعة ولاية المحكمة الجنائية الدولية لتشمل بالإضافة لدارفور كل مناطق السودان؟
ج: دى برضو ما بتطلع من جنيف ياحبوبتي، بتطلع بقرار من مجلس الأمن في نيويورك، لأنه مجلس الأمن هو من أصدر القرار المشهور 1593/2005
س: والخطوة الجاية شنو بخصوص مشروع القرار؟
ج: الدول العربية حتعمل تعديلات بسيطة على مشروع القرار وتقوم تودعه لدى سكرتارية المجلس في موعد أقصاه الأربعاء 2 أكتوبر، حتى يتم التصويت عليه يوم 10 أو 11 أكتوبر.
بكرة حأكلمك عن الدول الأعضاء في المجلس وتصويتهم المتوقع
سويسرا 18 سبتمبر 2024م
