نزار عبد القادر صالح يكتب : مالكم_كيف_تحكمون لجنة شاندى ورشماوي (4-4)

نزار عبد القادر صالح يكتب : مالكم_كيف_تحكمون لجنة شاندى ورشماوي (4-4)

لجنة شاندى ورشماوي (4-4)

س: أها الليلة الحصل شنو في جلسة مجلس حقوق الإنسان في جنيف؟
ج: نائب رئيس المجلس ترأست الجلسة، وقدمت في البداية ندى الناشف نائب المفوض السامي لحقوق الإنسان وندى قالت أزمة السودان أزمة غير مسبوقة، وعلى المجتمع الدولي وضع نهاية للحرب الدائرة.
وبعدها، قدم محمد شاندى رئيس لجنة التحقيق الدولية تقريره والتوصيات، وحسب ماجرت عليه العادة، أعطت رئيسة الجلسة الفرصة لممثل الحكومة السودانية للرد على محمد شاندى وعلى تقرير بعثة تقصي الحقائق
س: منو كان ممثل الحكومة السودانية يانزار ياولدي؟ ورد قال شنو؟
ج: ممثل الحكومة كان النائب العام اسمه الفاتح محمد عيسى طيفور، إتكلم كلام كتير مافيهو أي جديد، والحاجة الغريبة يا حبوبتي ما قال كلمة واحدة عن التقرير بتاع البعثة ولا عن التوصيات، بس ختم كلمته بطلب لمجلس حقوق الإنسان بضرورة إنهاء ولاية لجنة التحقيق الدولية ودعم اللجنة الوطنية لإنتهاكات قوات الدعم السريع للقانون الدولي لحقوق الإنسان والقانون الإنساني الدولي.
س: وتاني الإتكلم منو يانزار ياولدي؟
ج: إتكلمت المستشارة الخاصة للأمين العام للأمم المتحدة المعنية بالإبادة الجماعية، وقالت إحتمال كبير تقع إبادة جماعية في السودان مرة تانية بعد الإبادة الحصلت في دارفور زمان. وقالت غياب المساءلة والمحاسبة حيوصلنا لجريمة الابادة الجماعية، والعنف المستمر في البلد دمر النسيج الاجتماعي وطالبت الحكومة بالتعاون مع كل آليات الأمم المتحدة.
س: ومنظمات المجتمع المدني السودانية ما اتكلمت يانزار ياولدي؟
ج: الدكتور عبدالسلام سيد أحمد رئيس المرصد السوداني لحقوق الإنسان، إتكلم نيابة عن المنظمات السودانية، ورحب في بداية كلمته بتقرير بعثة تقصي الحقائق وبالتوصيات الوصلت ليها خاصة نشر قوات لحماية المدنيين وتوسيع مجلس الأمن لولاية المحكمة الجنائية الدولية لتشمل كل الأراضي السودانية وطالب أعضاء مجلس حقوق الإنسان بتجديد ولاية البعثة لمدة سنة تانية.
س: وبعدهم تاني الإتكلم منو يانزار ياولدي؟
ج: بعدهم فتحت رئيسة الجلسة نائب رئيس المجلس الباب للدول الأعضاء وللمراقبين وللمنظمات غير الحكومية للإدلاء بتعليقاتهم وأسئلتهم لأعضاء لجنة التحقيق الدولية.
س: أها بعد ده الحيحصل شنو في جنيف؟
ج: الخطوة الجاية مجموعة من الدول حتكتب مسودة لمشروع قرار يعتمده المجلس في نهاية أعماله يوم 11 أكتوبر 2024م
س: ومشروع القرار ده متوقع يكون مضمونه شنو؟
ج: أهم شئ تمديد ولاية اللجنة الدولية لتقصي الحقائق لمدة سنة جديدة يعني حتي أكتوبر 2025م.
س: يعني مجلس حقوق الإنسان ما حيطلع قرار بنشر القوات الأممية لحماية المدنيين وإحالة الملف للمحكمة الجنائية الدولية؟
ج: لا يا حبوبتي، دى ما من مهام المجلس، الحاجات دى إختصاص مجلس الأمن في نيويورك
س: ومجلس الأمن حيطلع القرار ده؟
ج: أعضاء مجلس الأمن غالبا ما حيطلعوا على تقرير اللجنة الدولية لتقصي الحقائق وحيدرسوا التوصيات الواردة فيه جيد، وبعدها يقوموا يطلعوا ليهم قرار تحت الفصل السابع من ميثاق الأمم المتحدة، عشان الوضع في السودان أصبح يهدد الأمن والسلم في المنطقة، والقرار يتضمن نشر قوات أممية لحماية المدنيين وتوسيع ولاية المحكمة الجنائية الدولية ومحاكمة الأشخاص المتهمين بإشعال فتيل الحرب والمتورطين في الإنتهاكات من الجيش، والدعم السريع والحركات المتحالفة مع الطرفين.
س: الصين وروسيا ممكن يستخدموا حق النقض “الفيتو”؟
ج: لو رجعنا لعشرين سنة لوراء ما حنلقى لا الصين ولا روسيا إستخدموا حق النقض لقرار متعلق بالسودان، آخر قرار صدر من المجلس خاص بوقف إطلاق النار، روسيا إمتنعت عن التصويت.
س: يعني ممكن يمر القرار بمجلس الأمن؟
ج: أيوة يا حبوبتي
س: الكيزان عاملين حملة إعلامية رهيبة ضد دخول القوات الأممية للبلد؟
ج: عارفة يا حبوبتي، الكيزان ديل شطار شديد في سواقة الناس بالخلاء
س: كيف الكلام ده يانزار ياولدي؟
ج: غالبية الناس بتنسى سريع، والشباب اليوم مغيب عن المعلومات الحقيقية، تصدقي يا حبوبتي لو قلت ليكي إنو الليلة يوم الثلاثاء ده في قوات أممية موجودة داخل السودان وبموافقة القوات المسلحة السودانية وقيادات الكيزان (أبيي)؟
وتصدقي لو قلت ليكي يوم 25 مايو سنة 2004م الفاتح عروة كان ماسك منصب مندوب السودان الدائم لدى الأمم المتحدة بنيويورك في الوقت داك، رسل رسالة لرئيس مجلس الأمن قال ليهو فيها لو سمحت لو سمحت أكررها ليك مرتين يا سعادة الرئيس خلي مجلسكم يقول لناس الإتحاد الأفريقي يجيبوا لينا مراقبين أفارقة عشان يراقبوا لينا وقف إطلاق النـار البينا وبين الحركات المسلحة في دارفور.
س: إنت بتتكلم جد وله بتهظر يانزار ياولدي؟
ج: والله العظيم بتكلم جد ده الحصل، والرسالة دي موثقة. وبعدها بدأ تدفق القوات الأفريقية والأممية للبلد بموجب إتفاقية تم توقيعها يوم 4 يونيو 2004م بين الإتحاد الأفريقي والحكومة السودانية.
ويوم 1 سبتمبر 2004م وصل اللواء فضل فضل الإله أكبر من (بنغلاديشي) لقيادة قوات حفظ السلام في السودان، ووصل كمان غلين غيلبرستون (بريطاني) كبير مستشاري الشرطة المدنية.
س: كلام عجيب وغريب، كنت قاعدة أسمع الرئيس البشير بكورك (لن نسمح اطلاقآ بدخول قوات أممية لدارفور)، و(إن محاولة دخول القوات الدولية مرفوضة تماماً وأن كل حجة يستند إليها الداعون للتدخل الدولي هي حجة باطلة لا سند لها)
والفريق صلاح قوش مدير جهاز الأمن والمخابرات السابق، برضو ما قصر، مرة من المرات مسك المايكرفون وقال: (اذا كان الخيار المطروح هو استعمار السودان ودخول الجيوش الاممية الى ترابه فان باطن الارض خير من ظاهرها)
و(قيادة الدولة تفضل الموت والشهادة في سبيل الله على ان تكون في دولة ذات سيادة منقوصة لا تحترم ارادة المواطنين او كرامة الامة)…
س: والحصل شنو بعد داك تاني يانزار ياولدي؟
ج: لو قلت ليك ما حتصدقي ياحبوبتي، يوم 26 أكتوبر 2004 ، المجلس الوطني (البرلمان) عقد جلسة برئاسة أحمد إبراهيم الطاهر ووافق فيها علي زيادة عدد القوات التابعة للاتحاد الأفريقي في دارفور.
#لاللحرب
سويسرا 10 سبتمبر 2024