نزار عبد القادر صالح يكتب: قانون اللجوء المصري (7)

نزار عبد القادر صالح يكتب: قانون اللجوء المصري (7)

س: الجديد شنو الحصل الليلة يانزار يا ولدي بخصوص قانون اللجوء المصري؟
ج: الجديد يا حبوبتي، وسائل الإعلام المصرية نشرت خبر قالت فيهو إنو الرئيس عبدالفتاح السيسي وقع على قانون لجوء الأجانب.
س: والكلام ده معناهو شنو؟
ج: معناهو إنو مشروع القانون الإتكلمنا عنه في الحلقات الستة الفاتت، القدموا مجلس الوزراء للجنة المشتركة البتضم: لجنة الدفاع والأمن القومي، ومكاتب لجان الشئون الدستورية والتشريعية، حقوق الإنسان، التعليم والبحث العلمي، والخطة والموازنة للجنة الدفاع والأمن القومي،
وبعدين لجنة الدفاع والأمن القومي قدمته لمجلس النواب، ومجلس النواب إعتمده، الليلة مشروع القانون ده أصبح قانون.
س: يعني بعد توقيع الرئيس السيسي تاني ما بنقول عليهو مشروع قانون؟
ج: أيوة يا حبوبتي
س: طيب الخطوة الجاية شنو بعد توقيع الرئيس على القانون؟
ج: نشره في الجريدة الرسمية
س: الجريدة الرسمية دي بتقصد بيها جرائد الأهرام، وأخبار اليوم والمصري اليوم واليوم السابع يانزار ياولدي؟
ج: لا يا حبوبتي، الجريدة الرسمية دي جريدة بتطلع من الحكومة، عندنا في السودان بتطلع من وزارة العدل من فترة لفترة، بكون موجود فيها كل القوانين والقرارات الجديدة، وفيها كمان اللوائح والنظم والتعليمات، حتى قرارات مجلس الوزراء والأوامر والإعلانات الرسمية بتاعت الدولة بتكون جواها.
س: شنو الفائدة من نشر القانون في الجريدة الرسمية يانزار ياولدي؟
ج: أي قانون يا حبوبتي مابصبح نافذ والمحاكم بتاخد بيهو والجمهور بلتزم بيهو إلا بعد نشره في الجريدة الرسمية.
س: في مدة محدد للنفاذ بعد نشره في الجريدة الرسمية يانزار ياولدي؟
ج: ده سؤال مهم يا حبوبتي، بختلف من قانون لقانون، في قانون لجوء الأجانب المصرى ده، المادة 3 في الإصداره، قالت القانون ده يسرى مباشرة في اليوم التالي من نشره في الجريدة الرسمية.
س: وقانون لجوء الأجانب المصري ده، هل تم نشره في الجريدة الرسمية؟
ج: أيوة ياحبوبتي، تم نشره في عدد أمبارح الإثنين 16 ديسمبر 2024م، للجريدة الرسمية رقم 50 (ج) مكرر.
س: يعني القانون خلاص أصبح ساري من اليوم الثلاثاء 17 ديسمبر 2024م؟
ج: أيوة يا حبوبتي
س: والجريدة الرسمية دي متاحة لأي شخص ممكن يشتريها من السوق؟
ج: أيوة يا حبوبتي
س: عندك فكرة يانزار ياولدي سعرها كم في السوق؟
ج: 15 جنيه مصري.
س: الحقوق المنصوص عليها في القانون ده، فقط للناس العندهم البطاقات الزرقاء، صاح؟
ج: صاح
س: طيب الخطوة الجاية شنو بعد ما القانون أصبح ساري المفعول؟
ج: الخطوة الجاية مجلس الوزراء يقوم بتشكيل اللجنة الدائمة لشئون اللاجئين
س: ذكرني مرة تاني يانزار ياولدي، اللجنة دي حتتشكل من منو؟
ج: من ممثلي لوزارات الداخلية، الخارجية، المالية والعدل
س: ومتين مجلس الوزراء حيشكل اللجنة دي؟
ج: خلال 90 يوم من يوم الليلة
س: ومهمتها حتكون شنو؟
ج: إستقبال طلبات اللجوء الجديدة، والفصل فيها، والتعاون مع المفوضية السامية للأمم المتحدة لشئون اللاجئين وغيرها من المنظمات والجهات الدولية المعنية بشئون اللاجئين، وذلك بعد التنسيق مع وزارة الخارجية، وكمان مهمتها التنسيق مع الجهات الإدارية في الدولة لضمان تقديم كافة أوجه الدعم والرعاية والخدمات للاجئين.
س: زمان مش قلت لي في لائحة تنفيذية حتوضح العلاقة بين اللجنة الدائمة ومفوضية اللاجئين؟
ج: أيوة يا حبوبتي، اللائحة التنفيذية حتوضح حاجات كتيرة ما واضحة في القانون.
س: واللائحة دي حتطلع متين؟
ج: حسب القانون خلال 180 يوم من يوم الليلة.
س: تمام يانزار يا ولدي، الصورة الآن واضحة شديد، بس عندي أسئلة سريعة: الحقوق المنصوص عليها في القانون ده من تعليم وصحة والحصول على وثيقة سفر وبعدين جنسية مصرية وغيرها، فقط للناس العندهم البطاقات الزرقاء، صاح؟
ج: صاح
س: الطلبات الجديدة للجوء حتتقدم للجنة الدائمة مش للمفوضية، صاح؟
ج: صاح
س: الناس العندهم البطاقات الزرقاء (المعترف بهم إنهم لاجئين)، اللجنة الدائمة عندها الحق إنها تسحب منهم صفة اللاجئ، صاح؟
ج: صاح
س: والناس العندهم البطاقات الصفراء (طالبي لجوء) الفصل في قضيتهم وقرار منحهم صفة اللاجئ من عدمه، الآن عند اللجنة الدائمة، صاح؟
ج: صاح
س: والناس العندهم البطاقات البيضاء، حيكملوا إجراءاتهم مع اللجنة الدائمة، صاح؟
ج: صاح
س: إعادة التوطين في أوروبا وأمريكا وأستراليا، للناس العندهم البطاقات الزرقاء فقط، صاح؟
ج: صاح
س: كلمة أخيرة يانزار ياولدي
ج: ضرورى الناس القاعدين في مصر يطلعوا كويس على القانون، ويتابعوا تشكيل الحكومة للجنة الدائمة ويعرفوا مقرها وين؟ وهل حيكون عندها مكاتب في المحافظات وله لا؟ وتجديد الإقامات الزرقاء والصفراء وين؟ ومجاني وله برسوم؟ لحدي ما الحرب العبثية دي تقيف.
سويسرا 17 ديسمبر 2024م