نزار عبد القادر صالح يكتب : مالكم كيف تحكمون لجنة ـشاندى ورشماوي (6)

 نزار عبد القادر صالح يكتب : مالكم كيف تحكمون لجنة ـشاندى ورشماوي (6)

لجنة ـشاندى ورشماوي (6)

س: وين أنت يانزار ياولدي، لي يومين قاعدة أفتش فيك؟
ج: موجود يا حبوبتي، خير مالك في شنو
س: كنت عاوزة أسالك، قريت لي كلام في واحد من القروبات بتاعت الواتساب دي قالوا كاتبوا واحد سوداني عندو دكتوراة في القانون.
قال لجنة تقصي الحقائق بتاعت شاندى ورشماوي دي جاتها “لطمة أممية”؟
ج: أبدا يا حبوبتي مافي حاجة ذي ده حصل وما أظن إنه زاتو حيحصل، كلام الدكتور ده ما صاح
س: كيف ما صاح؟
ج: لأنه مجلس حقوق الإنسان، خصص ليهو جلسة يوم الثلاثاء 10 سبتمبر الفات، لمناقشة التقرير الكتبوهو ناس لجنة التحقيق الدولية عن السودان، والجلسة إتكلم فيها مولانا محمد شاندي رئيس اللجنة، واتكلم فيها النائب العام السوداني، ونائب المفوض السامي لحقوق الإنسان وكمان مستشارة الأمين العام للأمم المتحدة المعنية بالإبادة الجماعية والدكتور عبدالسلام سيد أحمد رئيس المرصد السوداني لحقوق الإنسان، وإتكلموا فيها كمان ممثلي أكتر من خمسين دولة في العالم وعشرة منظمات غير حكومية لحقوق الإنسان، هل الحصل ده نقدر نقول عليهو “لطمة أممية”.
س: وتاني؟
ج: إذا كان دكتور القانون بعني بكلمة “لطمة أممية” إنو مجلس حقوق الإنسان رفض مناقشة التقرير والاستماع للتوصيات بتاعتها، ده ما حصل ذي ماشوفتي قبل شوية، وإذا كان بعني بيها إنو أعضاء مجلس حقوق الإنسان وقفوا في صف واحد مع الحكومة السودانية وصوتوا ضد مشروع القرار الكتبوهو (الأمريكان والبريطانيين والألمان والنيرويجيين)، فده برضو ما حصل لحدى اللحظة يا حبوبتي، لأنه موعد التصويت على مشاريع القرارات داخل المجلس لسه ما جاء. عشان كده مابعرف الدكتور ده بقصد باللطمة الأممية دي شنو؟
س: طيب متين التصويت على مشاريع القرارات يانزار ياولدي؟
ج: التصويت حيبدأ يوم الأربعاء 9 أكتوبر يا حبوبتي وحينتهي يوم الجمعة 11 أكتوبر 2024م.
س: كلامك واضح وموزون يانزار ياولدي، يالله أها كلمني عن التصويت على مشروع القرار والمتوقع في التصويت؟ يعني هل كل الدول الأعضاء في الأمم المتحدة حيصوتوا على مشاريع القرارات دي ذى ما قاعد يحصل في الجمعية العامة للأمم المتحدة في نيويورك؟
ج: لا أبدا يا حبوبتي، فقط 47 دولة من دول العالم هم الحيصوتوا على مشاريع القرارات الشهر الجاي
س: و47 دولة ديل من ياتو قارة؟
ج: من خمسة مجموعات جغرافية يا حبوبتي: 13 دولة من أفريقيا، 13 دولة من آسيا، 8 دول من أمريكا اللاتينية، 7 دول من أوروبا الغربية ودول أخرى، و6 دول من أوروبا الشرقية.
س: والدول دي بختاروهم كيف؟
ج: بالتصويت في الجمعية العامة في نيويورك
س: منو ال47 دولة الصوتوا السنة الفاتت في موضوع السودان؟
ج: الجزائر؛ الأرجنتين؛ بنغلاديش؛ بلجيكا; بنين؛ بوليفيا؛ الكاميرون؛ شيلي؛ الصين؛ كوستاريكا؛ كوت ديفوار؛ كوبا؛ التشيك ، إريتريا ، فنلندا؛ فرنسا؛ الغابون؛ غامبيا؛ جورجيا؛ ألمانيا؛ هندوراس؛ الهند؛ كازاخستان؛ قيرغيزستان؛ ليتوانيا؛ لكسمبرغ؛ ملاوي؛ ماليزيا؛ المالديف؛ المكسيك؛ الجبل الأسود؛ المغرب؛ نيبال؛ باكستان؛ باراغواي؛ قطر؛ رومانيا؛ السنغال؛ الصومال؛ جنوب أفريقيا؛ السودان؛ أوكرانيا؛ الإمارات؛ بريطانيا؛ الولايات المتحدة الأمريكية؛ أوزبكستان؛ وفييتنام.
س: السودان بالله عضو؟
ج: ايوة يا حبوبتي
س: يعني برضو حيصوت؟
ج: أيوة يا حبوبتي
س: شايفاك يانزار ياولدي قلت لي من بين الدول الأعضاء في مجلس حقوق الإنسان: الصين، وفرنسا، وبريطانيا والولايات المتحدة الأمريكية، طيب إذا واحدة من الدول ديل رفضت مشروع القرار هل القرار حيتلغي؟
ج: لا يا حبوبتي، التصويت في مجلس حقوق الإنسان مختلف عن التصويت في مجلس الأمن، هنا في جنيف مافي “فيتو”.
الدول هنا كلها ذى بعض مافي دول دائمة العضوية ودول ما دائمة العضوية. روسيا مثلا ما موجودة في العضوية، وبريطانيا كانت موجودة السنة الفاتت لكن السنة دي ما موجودة.
س: الله ينور عليك يانزار ياولدي، ثقافة حقوقية مجانية
ج: إنتي تأمرى يا حبوبتي، عاوزك تكوني دائما متابعة لكل صغيرة وكبيرة بخصوص حقوق الإنسان في السودان، عشان الناس ديك وأقلامهم ما يسوقوكي إنتي وصحباتك بالخلاء.
س: اها قول لي الدول ال47 دي صوتت كيف السنة الفاتت؟
ج: نتيجة التصويت كانت: 19 دولة صوتت لصالح مشروع القرار وتشكيل لجنة دولية لتقصي الحقائق، و16 دولة صوتت ضد مشروع القرار وضد إنشاء اللجنة، و12 دولة إمتنعوا عن التصويت.
س: ياريت تشرح لي أكثر يانزار ياولدي عشان الصورة تكون لي أوضح لمن تتكلم لي عن التصويت الحيكون الشهر الجاي؟ منو ال19 دولة الصوتت لصالح مشروع القرار، ومنو ال16 دولة الصوتت ضد ومنو 12 دولة الإمتنعوا عن التصويت.
فاصل نواصل
سويسرا 23 سبتمبر 2024م