نزار عبد القادر يكتب : مالكم_كيف_تحكمون لجنة شاندي ورشماوي (7)
لجنة شاندي ورشماوي (7)
س: الجديد شنو يانزار يا ولدي بخصوص بعثة تقصي الحقائق؟
ج: الجديد يا حبوبتي، أنه أمبارح الأربعاء الولايات المتحدة الأمريكية وبريطانيا والنيرويج وألمانيا، سلموا المسودة النهائية بتاعت مشروع القرار الخاص بالسودان لسكرتارية مجلس حقوق الإنسان
س: ممتاز، والتصويت حيبدأ يوم 9 أكتوبر صاح؟
ج: أيوة صاح يا حبوبتي
س: أها شنو أهم الفقرات في مشروع القرار ده؟
ج: مشروع القرار كله مهم، لكن أهم الفقرات هى البتتكلم عن الإدانة الواضحة والصريحة لاستمرار الحرب بين القوات المسلحة وقوات الدعم السريع والقوات المتحالفة مع الطرفين، والإدانة لجميع انتهاكات حقوق الإنسان، وكمان الدعوة للوقف الفوري والكامل لإطلاق النار، والتوصل عن طريق التفاوض إلى حل سلمي للنزاع بمشاركة نشطة الأطراف المدنية والعودة للحكم المدني.
س: وما قالوا حاجة في مشروع القرار عن نشر قوات أممية لحماية المدنيين؟
ج: في فقرة يا حبوبتي، بتحث الأمم المتحدة، والاتحاد الأفريقي، بالتعجيل بالنظر في الخيارات العملية لتعزيز حماية المدنيين من الإبادة الجماعية وجرائم الحرب والتطهير العرقي والجرائم المرتكبة ضد الإنسانية.
س: وتوسيع نطاق المحكمة الجنائية الدولية ما جابو سيرتو؟
ج: إتكلموا عن المساءلة عن انتهاكات حقوق الإنسان وقالوا ده موضوع أساسي لأي حل للأزمة المستمرة في البلد، وقالوا ضرورى تتعمل تحقيقات شفافة وذات مصداقية في جميع التجاوزات والانتهاكات المزعومة من جانب جميع الأطراف مش من طرف واحد، وضروري كمان وضع حد للإفلات من العقاب ومحاسبة المسؤولين عن ذلك من خلال عمليات عدالة جنائية قوية وذات مصداقية، وقالوا ليهم كمان في دور هام ممكن تلعبه المحكمة الجنائية الدولية.
س: ما طالبوا بتمديد عمل بعثة تقصي الحقائق بتاعت شاندى ورشماوي؟
ج: طالبوا بتمديدها لمدة سنة تانية، يعني من أكتوبر 2024م لحدي أكتوبر 2025م.
س: هل مشروع القرار الاتقدم امبارح للسكرتارية هو نفس مشروع القرار القدموهو الدول الأربعة يوم 18 سبتمبر 2024م لمن عملوا المشاورات المفتوحة، وله دخلوا عليهو تعديلات؟
ج: دخلوا عليها تعديلات كتيرة يا حبوبتي
س: سألتك السؤال ده يانزار ياولدي، عشان دكتور القانون السوداني الكلمتك عنه المرة الفاتت، كتب يوم 19 سبتمبر 2024م مقال بعنوان “لطمة أممية لبعثة تقصي الحقائق” وقال فيهو بالنص: “أي مشروع قرار يقدمه sponsors، لا تدخل عليه أي تعديلات ويعتمد كما هو”
ج: الكلام ده ما صاح يا حبوبتي، خليني أقول ليكي الصاح في النقطة دي
مقدمي مشروع القرار عملوا ثلاثة جلسات غير رسمية قبل ما يودعوا المشروع للسكرتارية، عشان يأخدوا أراء الدول والمنظمات حول المسودة، وبالفعل وصلتهم تعليقات من بعض الدول والمنظمات بالتعديل والحذف والإضافة لبعض الفقرات.
المسودة الأولى يوم 19 سبتمبر كانت بتحتوي على 2832 كلمة (27 فقرة ديباجية و22 فقرة عاملة) ذي ما بسموهم بلغة الأمم المتحدة، المسودة الأخيرة يوم 2 أكتوبر بتحتوى على 3006 كلمة (29 فقرة ديباجية و21 فقرة عاملة). في فرق وله مافي فرق؟
س: شرحك واضح ومفهوم شديد يانزار ياولدي، الليلة علمتني كمان حاجة جديدة في مشاريع القرارات: “الفقرات الديباجية والفقرات العاملة”.
ج: تحت الخدمة يا حبوبتي
س: نرجع تاني للتصويت وما أدراك ما التصويت، المرة الفاتت قلت لي شهر أكتوبر 2023م في 19 دولة صوتت لصالح مشروع القرار بإنشاء بعثة لتقصي الحقائق، و16 دولة صوتت ضده و12 دولة امتنعوا عن التصويت ديل هم منو؟.
ج: مع القرار (19):
الأرجنتين؛ بلجيكا؛ ألمانيا؛ أوكرانيا باراغواي؛ التشيك ، الجبل الأسود؛ شيلي؛ جورجيا ؛ كوستاريكا؛ فنلندا؛ فرنسا؛ ليتوانيا؛ لكسمبرغ؛ المكسيك؛ رومانيا؛ هندوراس؛ بريطانيا؛ الولايات المتحدة الأمريكية.
س: وديل كلهم موجودين في الدورة دي كمان؟
ج: أربعة منهم طلعوا يعني ما عندهم حق التصويت هم: الشيك والمكسيك و بريطانيا وأكرانيا، ودخلوا مكانهم هولندا وبلغاريا والبرازيل واليابان.
س: وال 16 الوقفوا ضد القرار؟
ج: السودان، الإمارات؛ إريتريا، باكستان؛ بوليفيا؛ الجزائر ، السنغال؛ الصومال؛ الصين؛ فيتنام، قطر؛ كوت ديفوار؛ كوبا؛ المالديف؛ المغرب؛ ماليزيا.
س: الإمارات صوتت مع الحكومة السودانية؟
ج: أيوة يا حبوبتي
س: وال 16 دولة ديل عندهم الحق في التصويت الاسبوع الجاي؟
ج: 3 من ال 16 ماعندهم الحق في التصويت لأنه عضويتهم إنتهت في ديسمبر 2023 وهم بوليفيا وباكستان والسنغال.
س: ومنو الدخل بدلهم؟
ج: الكويت، أندونيسيا وغانا
س: وال12 دولة الإمتنعوا عن التصويت ديل منو؟
ج: بنغلاديش؛ بنين؛ الكاميرون؛ الغابون؛ غامبيا؛ الهند؛ كازاخستان؛ قيرغيزستان؛ملاوي؛ نيبال؛ جنوب أفريقيا؛ أوزبكستان.
س: وديل موجودين وله طلعوا؟
ج: 2 منهم طلعوا، هم الغابون ونيبال، ودخلوا بديل ليهم بوروندي والدومنيكان العشرة الباقين موجودين.
س: أها تتوقع شنو يا نزار ياولدي، ال38 دولة القاعدين من السنة الفاتت في عضوية المجلس حيصوتوا بنفس طريقة السنة الفاتت؟ وله حيكون تصويتهم مختلف؟
وهل ال9 دول الدخلت جديدة لعضوية المجلس حتصوت مع الحكومة السودانية؟
فاصل ونواصل
سويسرا 3 أكتوبر 2024م
س: الجديد شنو يانزار يا ولدي بخصوص بعثة تقصي الحقائق؟ج: الجديد يا حبوبتي، أنه أمبارح الأربعاء الولايات المتحدة){kind=link}