نزار عبد القادر صالح يكتب : مالكم كيف تحكمون محادثات سويسرا (2)
نزار عبدالقادر صالح
مالكم كيف تحكمون س: الكيزان لييه ماعاوزين الإمارات تشارك في محادثات سويسرا يانزار ياولدي؟
ج: بقولوا الإمارات دي قاعدة تدعم في قوات الدعم السريع يا حبوبتي
س: طيب الإمارات دي ذاتها يانزار ياولدي مش كانت مشاركة في الإجتماعات السرية التلاتة الكانت بين شمس الدين كباشي وعبدالرحيم دقلو في المنامة البحرين في يناير الفات؟
ج: أيوة يا حبوبتي
س: والبرهان ده مش يوم الخميس 18 يوليو رفع سماعة التلفون واتكلم مع الشيخ محمد بن زايد؟
ج: أيوة يا حبوبتي
س: والعلاقات الدبلوماسية بين البلدين مش لحدى الليلة مستمرة ما إنقطعت؟ والسفير السوداني والدبلوماسيين المعاه لسه قاعدين في أبوظبي والسفير الإماراتي والدبلوماسيين المعاه ماطردوهم من بورتسودان؟
ج: أيوة يا حبوبتي
س: ومش فروع بنك السودان والخرطوم والنيلين لسه شغالة في أبوظبي ودبي؟
ج: أيوة يا حبوبتي
س: ومش القنوات الفضائية الثلاثة المكاتبها الرئيسية في الإمارات (“العربية” و”الحدث” و”سكاي نيوز عربية”) شغالين من بورتسودان؟
ج: أيوة يا حبوبتي
س: ومش الطيارات لسه شغالة بين البلدين تودى وتجيب؟
ج: أيوة يا حبوبتي
س: طيب الكيزان ديل لييه قاعدين يغشوا في الناس كده؟
ج: الكيزان ديل يا حبوبتي سايقين الناس سواقة صحي صحي بالخلا، عندهم آلة إعلامية ضخمة، موظفين ليها شباب وصحفيين وإعلاميين وبدفعوا ليهم قروش مبالغ فيها عشان السواقة دي. لكن الشارع واعي، والحرب دي كشفت للشباب حقيقة الكيزان، وكمان حقيقة عدد من الحركات المسلحة والشخصيات.
س: وإتذكرت حاجة تاني يانزار ياولدي الإتحاد الأفريقي ده مش معلق عضوية السودان من يوم إنقلاب 25 أكتوبر 2021م؟
ج: أيوة يا حبوبتي العضوية معلقة من الوقت داك لحدى الليلة، والكيزان موافقين انو الإتحاد الأفريقي يكون مراقب في المحادثات.
س: طيب خلينا نرجع لمحادثات سويسرا يانزار ياولدي، هل فعلا في محادثات في سويسرا ؟
ج: أيوة يا حبوبتي بدت يوم الأربعاء 14 أغسطس
س: في جنيف؟
ج: لا مافي جنيف ذاتها، في مكان سري خارج جنيف
س: وصحى وفد قوات الدعم السريع موجود في جنيف؟
ج: أيوة يا حبوبتي
س: والمراقبين المصريين، والإماراتيين، والإتحاد الأفريقي والسعوديين؟
ج: كلهم موجودين
س: والإجتماعات دى لسه مستمرة من يوم الأربعاء؟
ج: أيوة يا حبوبتي ، تصدقي الناس ديل حتي يومي السبت والأحد كانوا شغالين
س: معناها مهتمين بالوصول لإيجاد حل للأزمة؟
ج: أيوة يا حبوبتي، الناس ديل خلوا بلدانهم وبيوتهم وشغلهم عشان يقعدوا مع ناس الجيش والدعم السريع ويصلوا معاهم لإتفاق لوقف إطلاق النار ونزيف الدم في بلدنا، وعشان عيون ملايين النازحين والمشردين، وطالبي اللجوء في دول الجوار.
س: وصحي في مدنيين سودانيين مشاركين في المحادثات؟
ج: أيوة في مجموعات سودانية موجودة في جنيف متابعة بصورة دقيقة لسير الإجتماعات، لكن ما مشاركين بصورة رسمية في المحادثات.
س: والمحادثات دي حتستمر لحدي متين؟
ج: الأمريكان قبل بداية المحادثات كان قالوا حتستمر 10 أيام، يعني لحدي يوم السبت 24 أغسطس، ده قبل ما ناس الجيش يقولوا ما جايين لسويسرا.
س: هل غياب الجيش أثر على سير الإجتماعات يانزار ياولدي؟
ج: أبدا يا حبوبتي، المحادثات مستمرة، والمبعوث الأمريكي كل يوم بطلع وبعمل مؤتمر صحفي، حتى المراقبين امبارح ذاتهم طلعوا ليهم بيان مشترك بعد إجتماعهم مع وفد الدعم السريع في جنيف.
س: البيان ده قالوا فيهو شنو؟
ج: اتكلموا فيهو عن الاحتياجات الإنسانية العاجلة للشعب السوداني، والضرورة الملحة لاحترام القانون الإنساني الدولي، وتنفيذ إعلان جدة، وإتكلموا عن مسؤولية الطرفين عن حماية المدنيين، وحماية واحترام البنية التحتية المدنية بما في ذلك المستشفيات والمدارس، وإخلائها لاستخدامها الطبيعي، والسماح بحرية حركة المدنيين، وأهمية السماح بمرور آمن ودون عوائق للمساعدات الإنسانية ولعمال الإغاثة في جميع المناطق الخاضعة لسيطرة الدعم السريع.
س: يعني المحادثات لسه مستمرة؟
ج: أيوة يا حبوبتي، وممكن تمتد كمان أكتر من يوم السبت الجاي إذا قدر الليلة الثلاثاء المبعوث الأمريكي في القاهرة يقنع وفد البرهان المشاركة في محادثات سويسرا
س: هل بتتوقع ناس الحكومة يوافقوا؟
ج: الكيزان يا حبوبتي، أشطر حزب سياسي في المناورة وشراء الوقت، وإتعلموا في السنوات الفاتت كيف يتعاملوا مع المجتمع الدولي ومع الأمريكان تحديدا ده من جهة، ومن جهة تانية هم شايفين وعارفين المساحة الجغرافية المسيطر عليها الدعم السريع، وشايفين تعامل المجتمع الدولي في الفترة الأخيرة مع الدعم السريع، وعارفين كمان الإدارة الأمريكية عاوزة حل للأزمة السودانية عشان إنتخابات الرئاسة الأمريكية بعد أقل من تلاتة شهور ، والمبعوث الأمريكي تعب من السفر لجدة والقاهرة عشان يقنعهم ، وشافوا المحادثات ما تأجلت عشان هم ماجوا لسويسرا بل مستمرة بدونهم، وقوات الدعم السريع كسبت ليها نقاط بمشاركتها، وأكيد وصلوا لنتيجة مفادها لصبر المجتمع الدولي حدود
س: يعني حيوافقوا؟
بكرة بقول ليكم
سويسرا 20 أغسطس 2024م
