؏ــڜــڦ ڛۜــڔمۘــدۑْۧ هويدا الماحى -نقول نصبر على فلوران نلاقى المجلس ارتجّ.!

؏ــڜــڦ ڛۜــڔمۘــدۑْۧ هويدا الماحى -نقول نصبر على فلوران نلاقى المجلس ارتجّ.!

-الجيش هلال فى المطار شمال

-العليقى استقلت وما استخرت

} “الجيش هلال”.. وزى ما  العرضه عرضتين ..شمالا هلال وجنوبها (راعيهو حميدتي)

الحال ياهو نفس الحال فى المطار “مطار الخرتوم عموم)..قوات شعبنا بسطت سيطرتها على شمال المطار والجنجويد قابعين في الجنوب (العرضه ولا ما العرضه) ..؟

قد تتفتح الزهور

والسيادة للجيش والهلال.!

}  مجلس السوباط(اصحاب القروش هم اصحاب النفوذ) :لو قروشكم ما فراقه معاكم نحنا ..لا ساومنا ولا بعنا ..وحتما هلالنا بيوجعنا..!

-يا دايرين تقولو وما قادرين تقولو..

وكتين “العليقى “ديكتاتور ..ليه خليتوه يتبختر ويتمخطر..؟ على راى المثل:

قالو يا فرعون مين فرعنك؟ قال ما لقيت حدا يردني..(كدى ولا ما كدى)؟

}هل سيعوّل الوطن الهلال على مجلس يدار بالمزاجات والترضيات  ام بفقه (الزعلان كلمو يقع الخزان كلمو )..؟

استقالة العليقى سَارَّت بذكرها الرُّكبان  وكشفت (العُوَارُ) و(المتغطى بى توب المشاطات عريان )

ايعقل ما ان يغادر العليقى القروب كما رشح

حتى يتناقل الناقلة تفاصيل ما دار فى  اجتماع يفترض به انه (اجتماع مغلق )..ولا -يمكن ناس السوباط كانوا فاتحين الباب ضلفتين للغاشى والماشى والكلب والسايق الدرب ..؟  ياخ ابعدوا عنكم (القونات -المشاطات القولات السواطات )..مجلس شنو دا البضاعته فى السهلة؟يا قلبى لا تحزن

  -وفقا لما اوردته الصحف عن ملابسات الاستقالة انها كشفت كيف يدار الوطن الهلال

لو بالجد العليقى استقال عشان زعلان من اصرار الفاضل التوم على اقالة فلوران وجب عليان ان نعضَّ البَنان مرتين..خاصة و

قرار الإقالة من عدمه يفترض به ان يكون قرار المجلس وقرارات المجالس تخرج  عقب

(قتل الموضوع بحثا وتنقيبا)..يعنى  تقييم ودراسة وتفحيص وتمحيص  وإيجاد البدائل

حال اِسْتَقَرَّ الرَّأْيُ على اقالة فلوران والقرار الصائب ان تتم اقالته عقب نهاية الابطال (الفاتت) وليس الآن ..(انتوا ما شايفين حالة الايطالى “البطالى” مع المعردين عندما تجرأ من قولت تيت على المحترفين جت طوالى النمير “ورور” ليهو في عينه وقال ليهو  : لو عايز تآكل “قرقوش”معانا “اختا ” المحترفين ولازم “تختهم”اساسيين وما شغلتك نافعين ولا ما نافعين)..كلامى دا

موجه

“للاخوة اعضاء المجلس “النيام”..كنتوا وين وين انتوا كنتوا ..كنتوا وين يا الفجأة بنتو..!

الكانوا نايمين وصحوا يا دابهم..ياخ “البقت بقت”..اما كان الأَحْرَى ان يجتمع المجلس او المجتمعون منه بالجهاز الفنى وتوروهم العين الحمراء .؟

بعدين لماذا لم يتقدم الطرف الخفى “الاخر”باستقالته عقب نكوص العليقى عن استقالته ؟ والتى وفقا لما رشح فى راس كبير قالو:مرجوعه فى مسماها

عليكم الله ما بتخجلوا وانتوا جايين تفتعلوا الصراعات والزعيم الهلال

تبقت له اياما معدودات على اولى الاستحقاقات الافريقيه.؟ حقا

صمت دهرا ونطق كفرا

لكلِّ شدة مدة ولطف الله غالب

} ليه يا مازدا تعمل كدا..؟

قالوا مازدا اختار فندق لمعسكر المريخ لإراحة ولانوم ولا هدوء..والفندق يعج بحفلات الديسكو..(نظام سهر الجداد ولا نومه )فى الوقت الذى اختار لنفسه فيه فندق هادى ومريح

}قلة ادب الاستقالة

فى اداراتنا ما عارفه ليه البستقيل بمرق طوالى

ودا اكبر دليل على انه لا يبالى لعظم المسؤوليه الملقاة على عاتقه..والاستقاله ذاتها خشم بيوت ..وكلهن مجتمعات ليهن اصول انت استقلت من المجلس ولا من المنصب المعنى؟تانى حاجه قبل المغادره على عاتقك عهدة وامانة

هل تمت مناقشة الشرط الجزائي حال كنس فلوران ومنو فيكم  الدقه (سدره) للسداد..؟

-حال صدقت التسريبات لا مبرر للاستقالة سوى انها (للى الذراع)

-توقعت ان يكون لرئيس المجلس قرار صارم وحازم لحسم الفوضى ولكن .؟ منذ عهد لجنة التطبيع ولا يوم الليلة السوباط لا (حازم ولا سودكال)..اى والله

-نطالب مجلس الادارة بإصدار بيان حول الاستقالة التى لم تعد سرا خفيا

} غايتو قلبى بقول لى :القصه ما قصة جواز سفر  ..عضو المجلس عوض طاره اقعد به ما تم ودار فى اجتماع المجلس بمدينة بورتسودان زمان ما حدا به إعلان استقالته من القطاع الرياضى على الفيس فى لحظة غضب

وأعضاء المجلس (سكتم بكتم) نهايتو حسب ظنى عوض طاره لن يسافر لا الليله ولا باكر ولا بعد باكر.!

} شئنا أم أبَينا..المجلس بحاجة إلى ثورة تصحيحية واحسب ان هنالك بدلاء في مقاعد الاحتياطى

} اللخو “هداية الله” وين الحى بيك .. لا سمعناك استقلت لا لقيناك اشتغلت ولا انت ماك ماسك ملف الاستثمار من بره المجلس ؟

} متلازمة فلوران التى درج عليها بإحداث طفرة تحلق بينا فى الفضاء ومن ثم هبوووووووط غير عادى وغير مبرر ..ما لازمانا.

-ويبقى العشق مابقى سمو الوطن الهلال